Eiður Smári hafði betur gegn DV

Eiður Smári Guðjohnsen vann dómsmál gegn blaðamanninum Inga Frey Vilhjálmssyni og ritstjórum DV, þeim Reyni Traustasyni og Jón Trausta Reynissyni í dag.

Þeir voru þá dæmdir til að greiða honum 150 þúsund króna sekt hver vegna umfjöllunar blaðsins um fjárhagsmál Eiðs Smára. Þá þurfa þeir að greiða Eiði Smára samtals 400 þúsund í miskabætur.

Eiður Smári Guðjohnsen stefndi þeim öllum fyrir umfjöllun blaðsins um fjármál sín í desember 2009. Þá var sagt frá því að Eiður Smári skuldi 1,2 milljarð en eigi 800 milljónir og hafi meðal annars tapað á fjárfestingum sínum í Hong Kong, Tyrklandi og Reykjanesbæ. Eiður Smári krafðist fimm milljóna í miskabætur og eina milljón til að kynna dóminn í dagblöðum.

Dómurinn var kveðinn upp í Héraðsdómi Reykjavíkur í dag. Vilhjálmur Vilhjálmsson, lögmaður Inga Freys, hyggst áfrýja málinu til Hæstaréttar fyrir hönd umbjóðanda síns. Eftir dómsuppkvaðningu sagðist Vilhjálmur jafnframt standa við fyrri ummæli sín um að ef Eiður Smári ynni málið gætu blaðamenn alveg eins pakkað saman og farið heim.