Blásandi borhola er Hveragerðingum hvimleið

Blásandi borhola heldur vöku fyrir íbúum í Hveragerði. Magnús Þór Sigmundsson, tónlistarmaður í bænum, segir ástandið óviðunandi. Hann þurfi að ímynda sér að hávaðinn sé sjávarniður til að festa nótur á blað.

Magnús býr ásamt eiginkonu sinni fyrir neðan aðra borholu, litlu neðar í bænum, sem veldur einnig íbúum ónæði. „Hún malar nú bara eins og kettlingur núna en þegar hún lætur sem verst er þetta nánast óþolandi sko.“

Hann segir fólk í næsta nágrenni ekki sofa fyrir hávaða þegar hæst lætur í borholunni. Þau hjónin leituðu til lögreglunnar en rákust á vegg.

„Þeir sögðu að lögfræðingar lögreglustöðvarinnar töldu þetta ekki vera mál til að kæra því þetta eru náttúruöfl, en ég benti á að þessu væri stjórnað af mannavöldum þar sem þessu væri stjórnað með krana en ég fékk ekki að kæra.“

Magnús, sem er landsþekktur tónlistarmaður, segir þetta ekki hafa áhrif á tónsköpunina.

„Ég er alinn upp í Njarðvíkum og Suðurnesjum og ég get sætt mig við þetta með að færa þetta yfir á brim í roki, svipað og þegar brim skellur á klettum með miklum látum, og hávaðinn er líka eins og í miklu roki.“

Við ræddum við annan nágranna sem var óhress með Orkuveitu Reykjavíkur en samkvæmt upplýsingum frá Orkuveitunni er nú unnið að lausn málsins, bæði til skemmri og lengri tíma.