Hrekkjusvínin snúa aftur í söngleik í Tjarnarbíói

„Textarnir úr lögunum eiga svo vel við í dag," segir leikstjórinn María Reyndal.

Söngleikurinn Hrekkjusvín verður frumsýndur í Tjarnarbíói í október. Hann verður byggður á plötunni vinsælu Lög unga fólksins með Hrekkjusvínunum sem kom út 1977. Tinna Hrafnsdóttir og Sveinn Geirsson framleiða verkið og leika í því og María Reyndal leikstýrir.

„Þetta er ofboðslega skemmtileg plata. Þessi söngleikur verður fyrir alla fjölskylduna, þar á meðal fullorðna aðdáendur Hrekkjusvínanna," segir María. Setningar á borð við „hvert mannsbarn skuldar heila milljón" úr laginu „Krómkallar" og „helstu ráðamenn sofa með lygaramerki á tánum" úr laginu „Lygaramerki á tánum" eiga vel við í dag að mati Maríu. „Sagan endurtekur sig aftur og aftur, það er það sorglega við þetta allt saman. Kannski lærum við eitthvað í þetta sinn en við vitum það ekki."

 

María hefur áður leikstýrt söngleiknum Abbababb sem vann Grímuverðlaunin sem barnasýning ársins. Síðast leikstýrði hún gamanleikritinu Finnska hestinum í Þjóðleikhúsinu.

Hrekkjusvínin samanstóðu að miklu leyti af meðlimum úr Spilverki þjóðanna og Þokkabót. Tilurð hljómsveitarinnar var sú að hópur sem kallaði sig Gagn og gaman ákvað að gefa út plötur sem væru ekki venjulegar poppplötur. Valgeir Guðjónsson samdi og flutti öll lögin á Lögum unga fólksins ásamt Leifi Haukssyni, útvarpsmanni, og fleiri valinkunnu fólki. Meðal þeirra sem komu fram á plötunni voru Eggert Þorleifsson, Diddú, Egill Ólafsson og Magnús Einarsson, en skáldið Pétur Gunnarsson samdi textana.

 

Valgeir Guðjónssson tekur þátt í uppfærslunni í Tjarnarbíói. María vildi ekki tjá sig um hvort fleiri Hrekkjusvín komi við sögu en um þessar mundir er verið að leggja lokahönd á handritið, auk þess sem leikaraprufur hafa staðið yfir.

 

freyr@frettabladid.is