Er næsta stórstjarna í íslenskri myndasögugerð

Lilja Hlín Pétursdóttir sigraði í myndasögukeppni Ókeibæ-kur og fékk að launum útgáfusamning við fyrirtækið. Myndasagan hennar er bæði blóðug og ofbeldisfull.

Lilja Hlín Pétursdóttir bar sigur úr býtum í myndasögukeppni bókaforlagsins Ókeibæ-kur sem var haldin fyrir Ókeipiss, myndasögutímaritið sem kemur út á laugardaginn. Sama dag verður haldið upp á hinn alþjóðlega ókeypis-myndasögudag.

„Mig langaði til að vinna þannig að ég ákvað að gera eitthvað í anda þess sem Ókeibæ-kur gefur út," segir Lilja Hlín. Saga hennar nefnist Grallarar og er að hennar sögn mjög ofbeldisfull. „Þetta er blóðug saga en samt er undirliggjandi söguþráður um vináttu og hvers virði hún er í róstusömu samfélagi sem við lifum í," segir hún.

Í umsögn dómefndar stóð: „Lilja lék sér að forminu með því að segja söguna í gegnum teiknaðar polaroid-myndir. Kúlupennaskriftin og poppkúltúrvísanir í húmornum gerðu útslagið".

Í öðru til fimmta sæti í myndasögukeppninni, í engri sérstakri röð, lentu Ingvar Barkarson, Birta Þrastardóttir, Júlía Hermannsdóttir og þeir Magnús Ingvar Ágústsson, Eysteinn Þórðarson og Hróbjartur Arnfinsson sem sendu inn sameiginlega myndasögu.

Alls voru um fjörutíu sögur sendar inn frá fólki á öllum aldri. Umfjöllunarefnið var af ýmsum toga, allt frá geimgríni yfir í víkingasplatter. Allar sögurnar sem tóku þátt verða til sýnis í sal Hugleikjafélags Reykjavíkur við verslunina Nexus og verða einnig í tímaritinu Ókeipiss.

Lilja Hlín er 21 árs og starfar hjá Íslandspósti. Hún útskrifaðist af listnámsbraut í Fjölbrautaskóla Garðabæjar og stefnir á framhaldsnám, hugsanlega í hreyfimyndagerð. Fyrir sigurinn í myndasögukeppninni hlaut hún útgáfusamning við Ókeibæ-kur og er hún að sjálfsögðu í skýjunum yfir því. „Það er alveg geðveikt. Ég veit ekki alveg hvað ég á að gera við þetta en það verður eitthvað frábært. Ég er næsta stórstjarna í myndasögumenningunni á Íslandi," segir hún hress.

Aðspurð segist Lilja Hlín ekki eigi sér neitt eitt átrúnaðargoð á meðal myndasagnahöfunda. „Það er kannski ekkert sérstaklega mikið um að vera akkúrat á Íslandi en það eru nokkrir erlendir. Það myndi koma fólki á óvart hversu mikið af hæfileikaríku fólki gefur efnið sitt ókeypis á netinu."

Óvenju mikið verður um íslenskt efni á ókeypis-myndasögudeginum í ár, sem hefst kl. 13. á laugardaginn. Ókeipiss fæst gefins í Nexus auk þess sem hefti af tímaritinu Blek verða gefin. Nýtt myndasögublað lítur einnig dagsins ljós, Aðsvif, sem er teiknað og skrifað af tíu myndlistarnemum. Þá munu aðstandendur tímaritsins Furðusögur vera á staðnum til að kynna útgáfu sína.

Ókeibæ-kur og Neo/Blek setja einnig upp myndlistasýningu með verkum íslenskra teiknara í sal Hugleikjafélags Reykjavíkur.

freyr@frettabladid.is