Umfjöllun og viðtöl: Rússland - Ísland 30-19

Íslenska kvennalandsliðið í handbolta náði að vinna 3 leiki á heimsmeistaramótinu í Brasilíu og var með 50% vinningshlutfall.

Heimsmeistaralið Rússa reyndist of stór biti fyrir Ísland í 16-liða úrslitum keppninnar, lokatölur 30-19. Ísland lék vel í rétt um 40 mínutur en í stöðunni 18-16 sýndu Rússarnir styrk sinn og skoruðu þeir tvívegis 5 mörk í röð gegn Íslandi. Staðan í hálfleik var 15-12 og liðið sýndi á köflum að það er líklegt til afreka gegn fremstu liðum heims. Svo einfalt er það.

Rússar verða án efa eitt af þeim liðum sem verða í keppni um verðlaunasæti á þessu móti. Íslenska liðið er enn ekki með svörin gegn slíkum mótherja. Hraðinn og styrkurinn sem býr í þessu rússneska liði er eitthvað sem íslenskar handboltakonur eru ekki vanar að kljást við.

Ágúst Jóhannsson þjálfari íslenska liðsins var ekki sáttur með lokakaflann hjá liðinu. Hann hafði óskað eftir að liðið myndi ná að hanga lengur í Rússunum. En því miður var ekki orkan til staðar hjá liðinu.

„Líkamlega fannst mér við vera í góðu standi og tilbúnar í átökin. Það sem hefur verið erfiðast er þessi andlegi þáttur. Við vorum alveg svakalega hátt upp eftir sigrana gegn Svartfjallalandi og Þjóðverjum. Það fannst mér erfiðast að ná mér niður eftir þá leiki og núna veit ég að það má ekki gerast,“ sagði Karen Knútsdóttir leikstjórnandi íslenska liðsins.

Íslenska kvennalandsliðið getur verið stolt af árangrinum á þessu móti. Að komast í 16-liða úrslit er frábær árangur og framtíðin er björt.