Umfjöllun: Meistarabragur á sigri KR

KR vann dramatískan 3-2 sigur á Víkingi á heimavelli sínum í kvöld og jók forskot sitt á ÍBV á toppi deildarinnar í fjögur stig en KR á auk þess leik til góða. Staða Víkings í botnbaráttunni versnar enn því liðið er nú fimm stigum á eftir Grindavík en spilamennska Víkings hefur batnað mikið í síðustu tveimur leikjum.

KR-ingar nánast einokuðu boltann framan af leiknum og komust verðskuldað yfir á 23. mínútu en Víkingar svöruðu úr næstu sókn og sýndu að þeir voru komnir til að berjast á KR-völl.

Leikurinn róaðist eftir markið en þegar 33 mínútur voru liðnar af leiknum fékk Guðmundur Reynir Gunnarsson rautt spjald fyrir glórulausa tveggja fóta tæklingu og KR því einum færri í klukkustund. Þrátt fyrir að vera einum færri sótti KR áfram af krafti og komst yfir á sjöttu mínútu seinni hálfleiks.

Er leið á seinni hálfleik tóku leikmenn KR að þreytast og Víkingur sá meira og meira af boltanum og tókst að slá þögn á áhorfendur þegar Helgi Sigurðsson jafnaði metin þegar 20 mínútur voru eftir af leiknum.

Bæði lið reyndu að sækja sigurinn og fengu bæði færi til að skora. Víkingur var meira með boltann og KR beitti skyndisóknum. Þegar skammt var eftir höfðu KR-ingar safnað krafti til að pressa á Víking og úr síðustu sókn leiksins tryggði Kjartan Henry KR sigurinn og fjögurra stiga forystu á toppi deildarinnar. Óneitanlega meistarabragur á því hvernig KR landaði sigrinum einum færri gegn baráttuglöðu Víkingsliði sem hefði hæglega getað fengið meira út úr leiknum og þó KR hafi verið sterkari aðilinn lengst af.

Víkingur er fimm stigum á eftir Grindavík og þarf að fara að sigra leiki ætli liðið ekki að falla en batamerki hefur verið á leik liðsins í síðustu tveimur leikjum og aldrei að vita nema Víkingur nái að gera fallbaráttuna spennandi undir lok tímabilsins.

KR-Víkingur 3-2

1-0 Baldur Sigurðsson (23.)

1-1 Þorvaldur Sveinn Sveinsson (24.)

2-1 Kjartan Henry Finnbogason (51.)

2-2 Helgi Sigurðsson (71.)

3-2 Kjartan Henry Finnbogason (92.)

Dómari: Magnús Þórisson (5)

Skot (á mark): 11-10 (9-4)

Varið: Hannes 2 – Magnús 5

Hornspyrnur: 12-2

Aukaspyrnur fengnar: 18-9

Rangstöður: 2-1