Andri: Vantar trú á verkefnið

Andri Marteinsson þjálfari Víkings var eðlilega ósáttur eftir tapið gegn Keflavík í kvöld og óskar eftir því að leikmenn sýnir mæti til leiks með meira sjálfstraust.

„Mér fannst við byrja leikinn full seint. Í fyrri hálfleik vorum við að spila ágætlega úti á vellinum en það var í raun það sem Keflvíkingarnir leyfðu okkur þannig að við vorum komnir út úr stöðunum þegar við töpuðum boltanum. Þess vegna refsuðu þeir okkur ótt á tíðum með því að sækja hratt á okkur,“ sagði Andri eftir leikinn.

„Við löguðum þetta í hálfleik og mér fannst betri bragur á þessu hjá okkur og meiri kraftur í okkar leik og aðeins meiri trú á verkefnið sem jókst er leið á leikinn. Ég hefði bara óskað þess að seinni hálfleikur í dag hefði verið fyrri hálfleikur þá hefðum við örugglega vaxið enn meira í þeim síðari.“

Andri segir sjálfstraustið vera eitthvað sem leikmenn sínir verði að finna hjá sér ef ekki á illa að fara í sumar en Víkingur er komið í fallsæti. „Í síðustu tveimur leikjum skortir svolítið á það að við höfum trú á verkefnið og við þurfum að athuga það að við höfum mannskap í að klára verkefnið og menn verða að átta sig á því, bæði þjálfarar og lið, að við getum þetta.“

„Það er kominn einhver sálrænn þröskuldur á þetta. Við þurfum að ýta því til hliðar. Það eru hörkuleikir framundan. Við þurfum að snúa bökum saman og halda áfram með þetta verkefni sem við erum í. Þannig að við fáum betri úrslit eftir því sem trúin er meiri. Við þurfum að trúa því að krafturinn og vinnusemin skili betri úrslitum,“ sagði Andri að lokum.