Andersson: Austurríki verður á heimavelli í Svíþjóð

Austurríkismenn mæta fullir sjálfstrausts á HM í Svíþjóð þar sem liðið ætlar sér ekki að vera neinn farþegi. Austurríki er í riðli með Íslandi en strákarnir okkar eiga harma að hefna gegn Austurríkismönnum eftir slæmt tap gegn liðinu í undankeppni EM.

"Við förum í þetta mót með miklar væntingar. Það er búið að byggja upp sterkt lið hérna á síðustu árum sem er í sífelldri framför. Liðsandinn er gríðarlega góður og liðið er sannfært um að það nái fínum árangri á HM," sagði hinn sænski landsliðsþjálfari Austurríkis, Magnus Andersson.

Hann er þjóðhetja í Svíþjóð enda hluti af gullkynslóð landsliðsins. Andersson segir að það skipti máli að Austurríki muni fá góðan stuðning á mótinu þar sem hann sé Svíi.

"Sænsku áhorfendurnir munu styðja okkur eins og við séum á heimavelli. Ég get lofað því."

Markvörður liðsins, Nikola Marinovic, fór afar illa með Ísland í leiknum á síðasta ári og hann segir liðið þrífast á því að spila gegn sterkum þjóðum.

"Við viljum vinna þjóðir eins og Ísland, Ungverjaland og Noreg. Af hverju ættum við ekki að vinna þessi lið?" sagði Marinovic.