AGF samdi við tvo íslenska unglinga

Danska úrvalsdeildarfélagið gekk í vikunni frá samningum við tvo leikmenn íslenska U-17 landsliðsins sem fagnaði sigri á Norðurlandamótinu hér á landi fyrr í sumar - þá Óliver Sigurjónsson og Þórð Jón Jóhannesson.

AGF tilkynnti á heimasíðu sinni í dag að félagið hefði samið við Óliver en Þórður Jón gekk formlega til liðs við félagið í síðustu viku. Óliver skrifaði undir samning við félagið til 2014 hann er sextán ára gamall, rétt eins og Þórður Jón.

Aron Jóhannsson er nú á mála hjá AGF sem er í áttunda sæti dönsku úrvalsdeildarinnar. Aron hefur komið við sögu í öllum sex leikjum liðsins á tímabilinu til þessa.

Óliver kemur frá Breiðabliki en Þórður Jón var áður á mála hjá Haukum.