Brynjar Þór og félagar skelltu toppliðinu

Brynjar Þór Björnsson og félagar í Jämtland komu skemmtilega á óvart í kvöld er þeir skelltu toppliði sænsku úrvalsdeildarinnar, LF Basket. Lokatölur 86-70.

Jämtland hóf leikinn með miklum látum og leiddi eftir fyrsta leikhluta, 27-9. Gestirnir söxuðu aðeins að forskotið fyrir hlé en Jämtland fór langt með að klára leikinn í þriðja leikhluta sem liðið vann, 27-15.

LF Basket spriklaði hraustlega í lokafjórðungnum eins og við var að búast. Munurinn var þó einfaldlega of mikill og Jämtland gat því fagnað sigri.

Brynjar Þór hafði óvenju hægt um sig og skoraði aðeins þrjú stig á þeim 15 mínútum sem hann spilaði.

Jämtland er enn í næstneðsta sæti deildarinnar þrátt fyrir sigurinn góða.