Alexander og Þórir í beinni á EHF TV í dag

Íslendingaliðin Füchse Berlin og Kielce eru á ferðinni í Meistaradeildinni í dag og leikir beggja liða verða í beinni sjónvarpsútsendingu á sjónvarpsstöð EHF.

Klukkan 16.00 sækir lið Dags Sigurðssonar, Füchse Berlin, ungverska liðið Veszprém heim þar sem Alexander Petersson verður væntanlega í lykilhlutverki.

Klukkan 19.15 fá Þórir Ólafsson og félagar í pólska liðinu Kielce það erfiða verkefni að mæta Atletico Madrid á Spáni.

Báðir leikir verða eins og áður segir á EHF TV en þá stöð má nálgast hér.

Þess utan verður leikur danska liðsins AG gegn spænska liðinu Ademar Leon í beinni á DR1 sem má finna á fjölvarpi Digital Ísland.