Logi magnaður í mikilvægum sigri

Logi Gunnarsson skoraði 18 stig og gaf 5 stoðsendingar þegar lið hans, Solna Vikings, vann magnaðan sigur á Uppsala Basket, 89-85, eftir framlengdan leik í kvöld. Logi var í lykilhlutverki hjá Solna.

Mikil spenna var undir lok leiksins er Uppsala leiddi, 76-78. Logi reyndi þriggja stiga skot sem gekk ekki og Uppsala klúðraði skoti er 17 sekúndur voru eftir.

Solna fór því aftur í sókn og Logi átti stoðsendingu á Myrthil sem jafnaði, 78-78, er 12 sekúndur voru eftir. Ekki tókst liðunum að skora á lokasekúndunum og því varð að framlengja.

Logi og félagar voru mun beittari í framlengingunni og náðu strax frumkvæðinu. Munurinn þó aðeins tvö stig, 85-83, þegar 22 sekúndur voru eftir. Logi fór á vítalínuna tveim sekúndum síðar. Hann hitti úr báðum skotunum og kom Solna í 87-83. Það bil náði Uppsala ekki að brúa.

Solna komst upp úr fallsæti með sigrinum.