Rólegt hjá björgunarsveitunum

Þrátt fyrir mikið óveður er rólegt að gera hjá björgunarsveitunum að sögn Ólafar Snæhólm Baldursdóttur, upplýsingafulltrúa Landsbjargar. Björgunarsveitir voru kallaðar út fyrr í dag vegna þaks á húsi í Garði sem fauk.

Þá sinntu þeir einnig útkalli á Akranesi. Eftir það hefur kvöldið verið rólegt hjá björgunarsveitunum, sem hafa aðstöðu í Hafnarfirði núna.

Reiknað er með 20-25 m/s í lofti um mest allt land til morguns samkvæmt tilkynningu frá Vegagerðinni. Gera má ráð fyrir vindhviðum undir Hafnarfjalli allt að 40-45 m/s. og víða á norðanverðum Snæfellsnesi. Líklega lægir í fyrramálið.

Eins má reikna með snörpum hviðum við Hnífsdal og Arnardal á Súðavíkurvegi. Eins á Siglufjarðavegi, í Fljótum og við Sauðanesvita.