Karen Ösp gengur til liðs við Fram

Handknattleiksdeild Fram  hefur gengið frá samningi við Karen Ösp Guðbjartsdóttur, en leikmaðurinn gerir tveggja ára samning við Safamýraliðið.

Karen Ösp kemur frá ÍR og er aðeins 19 ára gömul, en þar lék hún upp alla yngri flokkana.  Á síðustu leiktíð lék Karen 16 leiki með ÍR í N1-deildinni og þótti standa sig vel.

Leikmaðurinn hefur leikið með yngri landsliðum Íslands undanfarin ár og ætti að styrkja Framliðið mikið og reynast drjúg á milli stanganna en hún er markvörður.

Fram varð bikarmeistari á síðustu leiktíð auk þess sem liðið komst í úrslitaeinvígið gegn Val, en beið lægri hlut.