Kári á leið til Aberdeen: Leit allt mjög vel út

Knattspyrnukappinn Kári Árnason er þessa dagana í leit að nýju knattspyrnuliði. Eftir að hafa verið sagt upp störfum hjá Plymouth vegna þess að hann sætti sig ekki við að leika launalaust hefur hann reynt fyrir sér hjá tveimur skoskum félögum. Hearts og Aberdeen.

„Það eru nokkur tilboð í gangi. Ég er bara að vega og meta mitt dæmi. Það er líklegt að ég komi til Skotlands en ekki víst," sagði Kári í spjalli við Vísi.

Kári segir það vega hæst hvar sé spiluð besta knattspyrnan og möguleikar hans á að komast lengra í íþróttinni séu sem mestir.

Það er kannski ofsögum sagt að Kári hafi verið á reynslu hjá Hearts. Þar var lítið gert annað en að hlaupa og fá tækifæri til þess að sanna sig.

„Það var bara hlaupið í hringi þar. svo var ég beðinn um að vera einhvern tíma í viðbót en ég tók það ekki til greina," sagði Kári.

Hann er þó mun sáttari við veru sína hjá Aberdeen í austur Skotlandi.

„Þetta lítur mjög vel út hjá Aberdeen. Sögufrægur klúbbur og frábær knattstpyrnustjóri. Vel haldið utan um hlutina og allt fagmannlega unnið," segir Kári.

Kári á inni margra mánaða laun hjá Plymouth. Óvíst er hvenær botn fæst í það mál.

„Það kemur allt í ljós. Það er mikilvægast að ganga frá þessu áður en ég fer að hafa áhyggjur af hinu. Það mun sennilega taka einhvern tíma að komast að niðurstöðu í því máli," sagði Kári við Vísi fyrr í dag.

Aberdeen hefur síðan tilkynnt að Kári gangi til liðs við félagið og verður skrifað undir samning á mánudag.