Umfjöllun: Valsmenn á toppinn

Valsmenn tylltu sér á topp Pepsi-deildar karla í kvöld með góðum sigri á Þór norðan heiða. Lokatölur voru 3-0 fyrir Val sem gefur þó ekki rétta mynd af gangi leiksins. Umdeilt mark afgreiddi Þórsara.

Þórsarar byrjuðu leikinn af miklum krafti og börðust vel í fyrri hálfleik. Þeir áttu liprar sóknir og sköpuðu hættulegar stöður, en fengu í raun aðeins eitt dauðafæri.

Meðal annars fengu þeir átta horn í fyrri hálfleik en besta færið fékk Gunnar Már sem skallaði boltann í slánna í upphafi leiksins. Skallinn var beint úr innkasti frá Gísla Páli Helgasyni.

Valsarar voru lengi í gang en þeir skoruðu eina mark fyrri hálfleiks. Þar var að verki Jón Vilhelm Ákason sem potaði boltanum snyrtilega í netið eftir að Haukur Páll hafði flikkað innkasti til hans.

Valsmenn vöknuðu aðeins við markið en Þórsarar misstu sjálfstraustið í nokkrar mínútur. Valsarar fengu tvö fín færi, fyrst fékk Atli Sveinn boltann í hnakkann og hann flaug yfir markið og svo skaut Arnar Sveinn framhjá úr fínu færi.

Þórsarar vildu tvö víti undir lok fyrri hálfleiks en Valgeir Valgeirsson var viss í sinni sök að dæma ekkert. Atli Sigurjónsson kláraði svo hálfleikinn með aukaspyrnu sem Haraldur varði vel í markinu.

Haraldur bað reyndar um skiptingu eftir rúmlega hálftíma leik og var augljóslega kvalinn á hægri hendi en hann kláraði nú samt leikinn.

Seinni hálfleikur byrjaði fjörlega þegar bæði lið fengu dauðafæri. Fyrst var Arnar Sveinn í dauðafæri við Þórsmarkið, hann náði ekki til boltans en vildi víti. Svo átti Atli frábæran sprett fyrir Þór og Sveinn Elías skaut yfir úr markteignum.

Valsmenn skoruðu svo annað markið eftir um það bil stundarfjórðungs leik í seinni hálfleik. Haukur Páll Sigurðsson skallaði þá hornspyrnu í netið og þetta mark drap nánast leikinn.

Þórsarar reyndu hvað þeir gátu en gekk illa að komast í góð færi, en Hörður Sveinsson gat klárað leikinn en Srjdan varði skalla hans af markteignum meistaralega.

Ótrúlegt atvik kláraði leikinn endanlega. Valsmenn voru flaggaðir rangstæðir og flaggið fór greinilega upp. Það fór hinsvegar aftur niður þegar Þórsarar voru hættir og Valsmenn skoruðu, þar var Rúnar Már Sigurjónsson að verki. Markið átti ekki að standa og allt brjálaðist á vellinum.

Áhorfendur kölluðu meðal annars "KSÍ-KSÍ" inn á völlinn og mótmæltu hástöfum.

Leikurinn fjaraði svo einfaldlega út.

Þórsarar voru ekki lakari aðilinn lengst af en nýttu ekki færin. Þeir spiluðu vel á löngum köflum en það gerðu Valsmenn líka. Lokatölurnar gefa ekki alveg rétta mynd af gangi leiksins en Valsmenn gerðu það sem gera þarf, nýttu færin.

Gunnar Már var góður í liði Þórs og bar þar af ásamt Atla Sigurjónssyni.

Rúnar Már var virkilega góður á miðju Vals og vörnin var þétt.

Valsmenn eru þar með komnir á topp deildarinnar, en KR á leik til góða.

Tölfræði:

Skot (á mark): 9-11 (5-7)

Varin skot: Srjdan 4 - 4 Haraldur

Horn: 11-3

Aukaspyrnur fengnar: 13-15

Rangstöður: 2-0

Dómari: Valgeir Valgeirsson 5.