Umfjöllun: Jafntefli í Víkinni

Íslandsmeistarar Breiðabliks fóru í heimsókn í Fossvoginn í gærkvöldi og mættu Víkingum í Stjörnugrófinni í níundu umferð Pepsídeildar karla. Leikar fóru 2-2 í einum fjörugasta leik sumarsins. Bæði lið léku blússandi sóknarleik og skemmtu sér og þeim sem á horfðu.

Fyrstu 20 mínútur leiksins voru það þeir grænklæddu úr Kópavoginum sem réðu ferðinni. Hinn ástralski Dylan Macallister skoraði fyrsta mark leiksins á 7. mínútu með skoti af stuttu færi inn í teig Víkinga.

Arnór Sveinn Aðalsteinsson átti þá fyrirgjöf frá hægri kanti sem Víkingar náðu ekki að hreinsa almennilega í burtu, Rafn Andri náði til boltans og sendi á Dylan sem skoraði af stuttu færi. 0-1 og Blikar komnir í sanngjarna forystu.  

Þrettán mínutum síðar jafnaði Húsvíkingurinn Baldur Ingimar Aðalsteinsson leikinn með skoti frá vítateigshorninu hægra megin eftir misheppnaða hreinsun Kára Ársælssonar úr vörn Blika.

Jöfnunarmark Víkinga kom þvert gegn gangi leiksins en það var einmitt þá sem þeir virkilega vöknuðu til lífsins því skömmu seinna voru þeir komnir í 2-1 forystu. Þar var að verki  táningurinn Viktor Jónsson en hann batt endahnút á vel útfærða skyndisókn með því að leggja boltann yfir Ingvar Kale í marki Blika. Staðan 2-1 í hálfleik og framundan var fjörugur seinni hálfleikur.  

Liðin skiptust á að sækja og oft skall hurð nærri hælum við mark liðanna. Víkingar voru nokkrum sinnum mjög nærri því að auka forystuna en einhvern herslumun vantaði.

Því miður fyrir heimamenn var þeim refsað rétt tæpu korteri fyrir leikslok þegar Guðmundur Kristjánsson jafnaði leikinn fyrir Breiðablik í 2-2 eftir laglegan undirbúning Kristins Steinsdórssonar og Rafns Andra Haraldssonar. Undir lok leiksins áttu bæði liðin fín færi en niðurstaðan varð 2-2 jafntefli sem ætti að geta talist sanngjörn úrslit.

Víkingar geta verið sáttir með leik sinna manna. Sóknarleikurinn var líflegur með þá Baldur, Martein og hinn unga Viktor sem bestu menn. Viktor Jónsson sem fæddur er árið 1994 olli varnarmönnum Breiðabliks miklum vandræðum og kom sér margsinnis í góð færi sem hann hefði þó getað nýtt aðeins betur. Blikar léku boltanum oft á tíðum ágætlega á milli sín en það er áhyggjuefni hversu illa liðið verst og gefa varnarmenn liðsins alltof mörg færi á sér.

Rafn Andri var frískastur í Blikaliðinu ásamt Dylan Macallister. Kristinn Steindórsson sýndi nokkrum sinnum hvers hann var megnugur en týndist þess á milli.