Mistókst að lækka tímavinnukaup

Fyrirætlanir íslenska fyrirtækisins Bakkavör Group um að lækka tímavinnukaup í einu af framleiðslufyrirtækjum sínum fóru út um þúfur. Breska stéttarfélagið Unite segir að það hafi verið vegna harðrar andstöðu stéttarfélagsins sem launin voru ekki lækkuð.

Forsvarsmaður United segir við breska fréttavefinn Food Manufacture að til hafi staðið að lækka laun lálaunafólks en hækka laun þeirra sem voru með betri tekjur. Launalækkunin hefði haft áhrif á tæplega 500 starfsmenn hjá fyrirtækinu sem framleiðir ídýfur, salat, samlokur, súpur og sósur.

Um 60% þeirra sem vinna hjá fyrirtækinu eru félagar í Unite stéttarfélaginu.