4x4 kærir takmörkun aðgengis að Vatnajökulsþjóðgarði

Stjórn Ferðaklúbbsins 4x4 mótmælir harðlega þeirri ákvörðun Svandísar Svavarsdóttur umhverfisráðherra að skrifa undir og samþykkja þá gerræðislegu ákvörðun stjórnar Vatnajökulsþjóðgarðs að takmarka verulega aðgengi almennings að þjóðgarðinum. Vegna þessa mun Ferðaklúbburinn kæra meðferð málsins.

Þetta kemur fram í tilkynningu sem Stjórn ferðaklúbbsins sendi frá sér í dag.

Forsvarsmenn hennar telja að stjórn þjóðgarðsins hafi hunsað allar ábendingar og tillögur sem hefðu getað stuðlað að sátt um málið.

Að stofna til stærsta þjóðgarðs í Evrópu án samráðs við þá aðila sem hafa hvað mest nýtt náttúru landsins sér til ánægju og yndisauka eru forkastanleg vinnubrögð og ekki sú stjórnsýsla sem á að sjást á Íslandi nútímans, að mati Stjórnar 4x4.

„Öll undirbúningsvinna að stofnun Vatnajökulsþjóðgarðs er fráfarandi stjórn garðsins til vansa og hefði ráðherra án tafar átt að senda málið til nýrrar stjórnar garðsins og óska eftir að málið yrði unnið í sátt þá fjölmörgu útivistarhópa sem nýta vilja garðinn svo sem jeppamenn, vélsleðamenn, hestamenn, skotveiðimenn, stangaveiðimenn, ferðaþjónustuaðila og fleiri.

Það er skoðun stjórnar Ferðaklúbbsins 4x4 að það ferli sem viðhaft hefur við stofnun Vatnajökulsþjóðgarðs sé ámælisverð og standist ekki stjórnsýslulög Ferðaklúbburinn 4x4 mun því kæra meðferð þessa máls," segir í tilkynningunni.

Ferðaklúbburinn 4x4 lýsir sig tilbúinn til að vinna að sátt um þjóðgarðinn, ef raunverulegur vilji er til slíks samráðs hjá stjórn Vatnajökulsþjóðgarðs og Umhverfisráðherra.