Bíleigandi sýknaður af kröfum Lýsingar

Fjármögnunarfyrirtækið Lýsing tapaði í dag máli í héraðsdómi sem það höfðaði gegn viðskiptavini sem gert hafði kaupleigusamning við fyrirtækið. Samningurinn að hluta til í erlendri mynt með gengistryggingu og krafðist Lýsing þess að maðurinn greiddi fyrirtækinu rúmar 466 þúsund krónur auk dráttarvaxta en stefndi taldi að samningurinn sem gerður var í upphafi hafi verið ólögmætur.

Dómari komst að þeirri niðurstöðu að ákvæði samningsins um gengistryggingu væri í raun ólögmæt verðtrygging í skilningi VI. kafla laga nr. 38/2001 og því bæri að ógilda gengistrygginguna.

Samningurinn var þó ekki ekki ógildur í heild sinni en hinir stefndu voru sýknaðir þar sem stefnandi hafði ekki sett fram varakröfu til lækkunar ef fallist yrði á málsástæðu stefnda og ekki fært sérstök rök fyrir að stefndi væri enn í skuld við stefnanda yrði fallist á málsástæður stefnda og hvernig fjárhæð hennar yrði reiknuð út.

Lýsingu var gert að greiða stefnda málskostnað, um 270 þúsund krónur.

Dóminn í heild sinni má sjá hér.