Lið Alfreðs og Guðmundar mætast þrisvar á næstu ellefu dögum

Það verður sannkallaður stórleikur í Meistaradeildinni í dag þegar Kiel tekur á móti Rhein-Neckar Löwen í Meistaradeildinni. Leikurinn hefst klukkan 16.15 að íslenskum tíma.

Kiel og Rhein-Neckar-Löwen eru efst og jöfn í riðlinum í Meistaradeildinni með 7 stig af 8 mögulegum. Þau hafa ekki enn tapað leik í Meistaradeildinni, Kiel gerði jafntefli við Barcelona og Löwen gerði jafntefli við pólska liðið KS Kielce.

Þetta verður í fyrsta sinn í vetur sem Alfreð Gíslason, þjálfari Kiel og Guðmundur Guðmundsson, þjálfari Rhein-Neckar Löwen mætast með lið sín.

Þeir Alfreð og Guðmundur munu sjá nóg af hvorum öðrum næstu ellefu daga því framundan eru tveir aðrir innbyrðisleikir liðanna, sá fyrri í Meistaradeildinni á næsta föstudag og sá síðari í deildinni 1. desember næstkomandi. Báðir þessir leikir fara fram á heimavelli Rhein-Neckar-Löwen.