Jakob sjóðhitnaði í upphafi fjórða leikhluta en það dugði ekki Sundsvall

Jakob Örn Sigurðarson og félagar í Sundsvall eru komnir upp að vegg í átta liða úrslitum sænsku úrvalsdeildarinnar í körfubolta eftir 67-75 tap fyrir Uppsala á heimavelli í gær. Uppsala er þannig komið í 2-1 og vantar aðeins einn leik til þess tryggja sér sæti í undanúrslitunum.

Jakob Örn Sigurðarson var með 20 stig, 2 stoðsendingar og 2 stolna bolta í leiknum og var stigahæstur hjá Sundsvall-liðinu. Jakob hitti úr 7 af 17 skotum sínum þar af 4 af 11 fyrir utan þriggja stiga línuna.

Jakob var óstöðvandi á fyrstu tveimur og hálfri mínútu fjórða leikhlutans þegar hann skoraði ellefu stig á aðeins 152 sekúndum. Jakob kom þar sínu liði yfir á ný í leiknum en það dugði þó ekki því Uppsala var sterkara á lokamínútum leiksins.

Sundsvall byrjaði betur og var 18-17 yfir eftir fyrsta leikhluta og 35-30 yfir í hálfleik. Það gekk hinsvegar ekkert í þriðja leikhlutanum sem Uppsala vann 23-14 og komst fjórum stigum yfir fyrir lokaleikhlutann, 49-53.