Tilgangsleysi FME og SÍ

Þær eru skoplegar ásakanir FME og Seðlabanka Íslands, um að Samtök lánþega hafi stuðlað að verulegu hættuástandi á fjármálamarkaði með hagsmunagæslu sinni. Sérstaklega þegar litið er til þáttar FME og SÍ í hruninu.

Í svari FME til umboðsmanns Alþingis er bent á að FME starfi eftir lögum nr. 87/1998 um opinbert eftirlit með fjármálastarfsemi.

Það er vel að stjórnendur FME átta sig á því hvert hlutverk þess er, en þeir virðast samt ekki skilja það hlutverk. Hvergi í lögum segir að FME sé hagsmunagæsluaðili fyrir fjármálakerfið, heldur er skýrt á um það kveðið að hlutverk FME sé að gæta hagsmuna almennings gagnvart fjármálakerfinu.

Á það meðal annars við um viðbrögð við skýrum lögbrotum, óeðlilegum innheimtuaðferðum sem og að sjá til þess að eftirlitsskyldir aðilar hafi starfsleyfi í samræmi við starfsemi.

Ekkert af þessu hefur hingað til verið skrifað í starfslýsingu starfsmanna FME og ekkert hefur á því borið að starfsmenn FME ætli sér að bæta þar úr.

Störf FME og SÍ bera með sér að hagur fjármálafyrirtækja sé öllum öðrum hag hærri og því beri að miða allar tilskipanir og breytingar að því að gera þeim aðilum sem hæst undir höfði á kostnað almennings. Og hér erum við komin að kjarna þess vandamáls sem lýðveldið Ísland á við að glíma í dag.

Rangir aðilar eru í vinnu fyrir rangan hóp.

Grundvöllur þjóðfélagsins erum við, fólkið í landinu. Án fólks eru engin fyrirtæki og án okkar er því ekki um neitt fjármálakerfi að ræða.

Fjármálakerfið er sett fram til að þjónusta almenning og því misskilningur að börn séu getin til þess eins að þjóna starfsævina á enda svo viðhalda megi stöðugleika í ónýtu fjármálakerfi.

Fólk hefur í raun ekkert við fjármálakerfi að gera, enda hvorki virðisauki né framleiðsla í fjármálakerfinu.

Það er því okkar sem hér stöndum og nú lifum, að taka höggið og rykkja ónýtum plástrinum af með snöggri sveiflu, og vernda með því eigin hag, barna okkar og afkomenda þeirra um ófyrirséða framtíð.

Ef við gerum ekki neitt til að takast á við þetta meingallaða kerfi, erum við að hneppa komandi kynslóðir í skuldaþrældóm um ókomna tíð.

Samtök lánþega settu fram yfirlýsingu hvar lánþegar gengistryggðra skuldbindinga voru hvattir til að greiða ekki af þeim fyrr en höfuðstóll þeirra og afborgunarþáttur yrðu leiðréttir til samræmis við skýra niðurstöðu Hæstaréttar.

Var þessi yfirlýsing sett fram til að vernda hagsmuni almennings og standa Samtökin við þessi tilmæli og hvetja til þess að eftir þeim verði farið hér eftir sem hingað til. Má benda á að þeir viðskiptavina AVANT sem fór eftir þessum tilmælum eru nú mun betur settur en þeir sem það gerðu ekki, enda ljóst að AVANT er farið á hliðina með tilheyrandi tjóni fyrir þá lánþega sem ofgreitt hafa til þess fyrirtækis.

Engin tilmæli hafa borist, hvorki frá FME né SÍ í þá átt að vernda hagsmuni almennings komi til þess að önnur fjármálafyrirtæki fari á hliðina og ekkert sem bendir til að slík tilmæli séu á leiðinni.

Til að stuðla að þjóðhagslegum stöðugleika og styrkja almenna hagsæld þá ítreka Samtök lánþega þessi tilmæli sín.

Er því rétt að benda á að Hæstiréttur hefur fellt sinn dóm og ef fjármálafyrirtækin telja sig eiga betri rétt en þar er fram settur, þá er það þeirra að sækja málin fyrir dómi. Lánþegar hafa skýra niðurstöðu Hæstaréttar að líta til og það munu lánþegar gera.