Hinar sérstöku liðstreyjur AGK seljast eins og heitar lummur

Jesper Nielsen, skartgripajöfur og eigandi danska liðsins AGK, er himinlifandi með þær móttökur sem lið hans hefur fengið í vetur en það hefur verið troðfullt hús á öllum leikjum liðsins.

Nielsen býður ekki bara upp á ofurlið, sem Arnór Atlason og Snorri Steinn Guðjónsson leika með, heldur hefur hann lagt gríðarlega mikið í umgjörðina og það hefur virkað.

Allt hefur verið gert til þess að skapa athygli og liður í því að skapa athygli var að láta liðið spila í körfuboltatreyjum sem mörgum fannst kjánalegt.

Burtséð frá því þá hafa treyjurnar hreinlega rokið út.

"Við erum búnir að selja yfir 1.500 treyjur á einum mánuði. Það er algjörlega einstakt í Danmörku. Fólk er síðan á biðlista eftir því að fá treyjur," sagði Jesper á bloggsíðu sinni.