Það kemur reglulega fyrir að bifreiðaeigendur verði fyrir tjóni vegna þess að hestar, eða önnur húsdýr, nagi lakkið af bílunum þeirra. Tjónið fæst ekki bætt með bifreiðatryggingunum. Vísir sagði frá því í gær að bræður sem voru við veiði í Eystri Rangá hefðu orðið fyrir verulegu tjóni þegar hestar nöguðu lakkið af húddinu og hliðum á Mazda 6 bifreið þeirra.
„Þetta gerist alveg nokkrum sinnum yfir sumartímann og líka vetrartímann. Þetta eru hestar og kýr. Menn eru komnir í sveitina og leggja bílunum og svo kemur dýrið að bílnum og fer að sleikja seltuna og sækist eftir því," segir Jóhann Jóhannsson, deildarstjóri ökutækjatjóna hjá VÍS. Hann segir að það fari síðan eftir aðstæðum hverju sinni hvort um sé að ræða tjón sem sé bætt með ábyrgðartryggingu bóndans eða hvort það sé ekki bótaskylt. „Það er alltaf skoðað hvert tilfelli fyrir sig," segir Jóhann. Hann segir að í sumum tilfellum keyri ökumenn inn á lokuð svæði þar sem hestar eða kýr séu höfð í girðingum. „Þá eru menn með sína bíla á eigin ábyrgð," segir Jóhann.
Hann tekur það skýrt fram að kaskótrygging bifreiða nái ekki yfir tjón af þessu tagi. „Það er árekstur, útafkeyrsla velta hrap og skemmdarverk. Þetta flokkast ekki undir skemmdarverk," segir Jóhann.
Hestar naga bíla reglulega
Tengdar fréttir
Hestar stórskemmdu bíl grunlausra veiðimanna
Bræður sem fóru að Eystri-Rangá í byrjun júlí urðu heldur betur fyrir vonbrigðum þegar að þeir sneru úr veiðinni og hugðust keyra á brott. Hestar sem voru í nágrenni við veiðistaðinn höfðu ráðist á bílinn og stórskemmt hann. „Þeir nöguðu bílinn alveg niður í lakk, segir Óskar Benediktsson,“ faðir drengjanna í samtali við Vísi.
Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.
