Sigrar hjá Rhein-Neckar Löwen og HSV Hamburg í kvöld

HSV Hamburg vann 29-25 útisigur á SG Flensburg-Handewitt og Rhein-Neckar Löwen vann 37-24 sigur á TSV Dormagen í þýsku úrvalsdeildinni í handbolta í kvöld. Norðmaðurinn Bjarte Myrhol skoraði fimmtán mörk fyrir Rhein-Neckar Löwen.

Alexander Pettersson skoraði fjögur mörk fyrir SG Flensburg-Handewitt í tapinu á móti toppliðinu í HSV Hamburg. Oscar Carlén var markahæstur í liðinu með fimm mörk.

Snorri Steinn Guðjónsson og Ólafur Stefánsson skoruðu báðir tvö mörk fyrir Rhein-Neckar Löwen í kvöld en annað marka Ólafs var úr víti. Liðið hafði mikla yfirburði í þessum leik og var komið í 15-10 í hálfleik.