Telur Catalinu þegar refsað

Verjandi Catalinu Mikue Ncogo vill að ákæru á hendur henni fyrir að hagnast á vændisstarfsemi fimm kvenna verði vísað frá. Hann telur að Catalina hafi í raun þegar hlotið fyrir það dóm. Þetta kemur fram í greinargerð lögmannsins Jóns Egilssonar, samkvæmt heimildum Fréttablaðsins.

Catalina var í desember dæmd í tveggja og hálfs árs fangelsi fyrir fíkniefnainnflutning og að gera út þrjár nafngreindar vændiskonur „auk fleiri ónafngreindra kvenna“.

Jón bendir í greinargerð sinni á að úr því að fyrri dómurinn telji sannað að hún hafi gert út fleiri ónafngreindar konur, og miði refsinguna við það, hljóti konurnar fimm í nýja málinu að falla þar undir. Ekki sé hægt að refsa Catalinu aftur fyrir sama brotið og því beri að vísa þessum lið frá.

Catalina er jafnframt ákærð fyrir mansal. Hún hafi svipt þrjár kvennanna frelsi sínu og haldið þeim í kynlífsþrælkun.

Þessu er alfarið hafnað í greinar-gerðinni. Meðal annars liggi fyrir að konurnar hafi sjálfviljugar stundað vændi erlendis áður en þær komu hingað til lands. - sh