Endurskoðun peningastefnu stendur fyrir dyrum

Þetta kom fram í ræðu Más Guðmundssonar seðlabankastjóri í ræðu hans á ársfundi Seðlabanka Íslands sem haldinn var í dag.

Már segir að það þurfi líka að draga lærdóm af framkvæmd peningastefnunnar á ofþenslutímanum og í aðdraganda fjármálakreppunnar. Verðbólgumarkmið og flotgengi ollu ekki bankahruninu enda væru þá mun fleiri bankakerfi hrunin um allan heim en raunin varð.

„En peningastefnan var hluti af þeirri atburðarás sem hér varð og margvíslegir erfiðleikar komu fram við framkvæmd hennar í þeim aðstæðum sem hún bjó við. Það mun gefast tækifæri til að fjalla um það nánar síðar en vandamálið var að mínu viti ekki verðbólgumarkmiðið sem slíkt enda sýna rannsóknir að lönd í verðbólguvanda eru líklegri til að lenda í bankakreppum heldur en hin og fara líka verr út úr þeim," segir Már Guðmundsson.

„Vandinn var fremur að samspil mismunandi hluta efnahagsstefnunnar var ekki sem skyldi auk þess sem ljósara hefur orðið að framkvæmd frjáls flotgengis er flókin og erfið í mjög litlum opnum hagkerfum sem eru tengd umheiminum sterkum fjármálalegum böndum. Þá verður að endurmeta hugmyndir sem byggjast á skörpum skilum á milli peningastefnu og fjármálastöðugleikastefnu og taka verður meira mið af þeirri sérstöku áhættu sem fylgir litlum og óstöðugum gjaldmiðli."

Már segir að allt verði skoðað með opnum hug og muni bankinn kryfja til mergjar tvo möguleika: Annars vegar þátttöku í Myntbandalagi Evrópu. Hins vegar þá peningastefnu sem kemur til greina ef Ísland stendur utan Evrópusambandsins og Myntbandalagsins. Sú stefna gæti líka nýst í aðdraganda aðildar ef af verður. Stefnt er að áfangaskýrslu snemma sumars og ítarlegri skýrslu snemma árs 2011.