Svali: Ég hlýt að vera svona andfúll

„Ég hlýt að vera svona skelfilega erfiður í samstarfi, andfúll og geðstirður á morgnana," segir Sigvaldi Kaldalóns, dagskrárstjóri útvarpsstöðvarinnar FM 957 og eini liðsmaður morgunþáttarins vinsæla Zúúber.

Sigga Lund og Gassi Ólafsson, samstarfsfólk Svala til sex ára, hafa bæði tilkynnt að þau séu hætt störfum og ætli að snúa sér að einhverju öðru, Sigga nú síðast í gær.

Sigvaldi, oftast kallaður Svali, upplýsir að þau hafi áttað sig á því að þátturinn Zúúber væri búinn að syngja sitt síðasta og því hafi verið ákveðið að hætta með þáttinn. Sjálfur hyggst hann þó halda áfram að vakna með Íslendingum í útvarpinu. Og nú í nýjum þætti sem mun að öllum líkindum nefnast Svali og félagar og hefst 17. maí.

Svali hefur þegar fengið til liðs við sig þau Erp Eyvindarson og Höllu Vilhjálmsdóttur sem verða með vikuleg innslög í formi hrekkja eða annarra skemmtilegheita.

Þá mun Jóhanna Vigfúsdóttir einnig verða fastur gestur í þessum nýja morgunþætti en með Svala í hljóðstofu verður Kristján Ingi Gunnarsson. Kristján er ekki ókunnur fjölmiðlaumhverfinu því hann var einn liðsmanna sjónvarpsþáttarins Ópsins ásamt þeim Ragnhildi Steinunni og Þóru Tómasdóttur.

Í þennan her eiga síðan eftir að bætast fleiri. „Já, er ekki betra að hafa sem flesta í kringum sig þannig að áfallið verði minna þegar einhver hættir," segir Svali og hlær. - fgg