Mikið um meiðsli í herbúðum Kiel

Alfreð Gíslason á í nokkrum vandræðum þessa dagana vegna mikilla meiðsla í leikmannahópi Þýskalandsmeistara Kiel.

Nú síðast var greint frá því að sænski línumaðurinn Marcus Ahlm mun ekki spila með liðinu fyrr en eftir HM í Svíþjóð en hann handarbrotnaði í leiknum gegn Rhein-Neckar Löwen í Meistaradeildinni á föstudagskvöldið.

Hann er ekki eini lykilmaðurinn í liði Kiel sem eiga við meiðsli að stríða því þeir Daniel Narcisse, Kim Andersson og Christian Zeitz eru allir frá. Narcisse sleit krossband í hné í upphafi tímabilsins og missir af þeim sökum af HM.

Óvíst er hvort að Ahlm verði með á HM í heimalandinu en ljóst er að hann spilar ekki meira með Kiel fram að áramótum.