Hreiðar Már Sigurðsson handtekinn

Hreiðar Már Sigurðsson, fyrrverandi forstjóri Kaupþings, var handtekinn af sérstökum saksóknara í hádeginu í dag. Farið var fram á tveggja vikna gæsluvarðhald í Héraðsdómi Reykjavíkur fyrr í dag. Dómari tók sér sólarhrings umhugsunarfrest og verður Hreiðar Már því í haldi lögreglu að minnsta kosti til morguns.

Sérstakur saksóknari hefur að undanförnu haft til rannsóknar meinta allsherjarmarkaðsmisnotkun Kaupþings og var meðal annars ráðist í húsleitir í Lúxemburg í tengslum við málið.

Hreiðar Már var forstjóri Kaupþings um árabil eftir að bankinn var einkavæddur. Hann var skattakóngur á Íslandi um tíma.