Innlent

Höfuðpaur í fíkniefnamáli sýknaður en annar dæmdur

Jón Hákon Halldórsson skrifar
Davíð Garðarsson var dæmdur í fjögurra og hálfs árs fangelsi.
Davíð Garðarsson var dæmdur í fjögurra og hálfs árs fangelsi.
Guðlaugur Agnar Guðmundsson, sem var dæmdur í fjögurra og hálfs árs fangelsi í sumar, fyrir aðild að stórkostlegu fíkniefnasmygli frá Spáni til Íslands og peningaþvætti tengdum innflutningnum, var sýknaður af ákæru um fíkniefnasmyglið í Hæstarétti í dag. Hann var hins vegar dæmdur í tveggja ára fangelsi fyrir peningaþvættið. Héraðsdómur hafði fundið þá Davíð Garðarsson og Guðlaug Agnar seka um að bera höfuðábyrgð á smyglinu. Þeir fengu báðir jafn langa dóma í héraði.

Hæstiréttur segir hins vegar að Guðlaugur hafi neitað sök, á öllum stigum málsins. Í upphafi hafi rannsókn málsins snúið að honum einum og sími hans verið hlustaður í nokkurn tíma. Þá hafi legið fyrir að þau fíkniefni sem um ræddi í málinu höfðu verið flutt með bifreið sem Guðlaugur hafði haft afnot af. Annar sakborningur í málinu, sem iðulega er kallaður Æ í dómnum, hafi borið því við í skýrslutöku hjá lögreglu að Guðlaugur hafi beðið hann um fá mann til að flytja fíkniefnin hingað til lands sem hann hafi gert. Fyrir dómi hafi Æ lýst atvikum á annan veg og borið því við að hann og Pétur Jökull Jónasson hafi staðið saman að skipulagi innflutningsins.

Hæstiréttur kemst því að þeirri niðurstöðu að þó fullt tilefni væri til að draga þessa frásögn í efa yrði ekki fram hjá því horft að fyrir dómi hefði enginn borið um hlut Guðlaugs að innflutningnum, sem Æ hafi einn lýst í lögregluskýrslu. Samkvæmt þessu væri ekki hafið yfir skynsamlegan vafa að Guðlaugur hafi átt þátt að innflutningi fíkniefnanna og var hann sýknaður af þeim sökum.

Refsing Péturs Jökuls Jónassonar var milduð úr þriggja ára fangelsi í tveggja ára fangelsi.







Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


×