Síminn ekki ríkisstyrktur að mati sérfræðinga

Fjarskiptasjóður óskaði eftir umsögn fjármálaráðuneytisins til að taka allan vafa um að útboð sjóðsins, á háhraðanettengingum, gæti hugsanlega stangast á við ríkisstyrkjareglur ESB. Í tilkynningu frá Fjarskiptasjóði segir að það hafi verið álit sérfræðinga fjármálaráðuneytisins á sviði ríkisstyrkja að svo væri ekki.

Þar segir að Fjarskiptasjóður hafi auglýst útboð vegna háhraðanettengingar á sínum tíma. „Verkefnið snerist um uppbyggingu á háhraðanetsþjónustu á svæðum þar sem háhraðanetþjónusta var ekki í boði og engin áform fjarskiptafyrirtækja að bjóða uppá slíkar tengingar á markaðslegum forsendum."

Um helgina var sagt frá því í fréttum að Vodafone hafi stefnt Símanum og Fjarskiptasjóði ríkisins vegna samnings þeirra um háhraðatengingar. Vodafone segir að Síminn sé ríkisstyrktur með samningum og krefst bóta.

Sjö tilboð bárust Fjarskiptasjóði og voru tilboðsfjárhæðir eftirfarandi:

1. Nordisk Mobil Island ehf. Heildartilboðsfjárhæð 974.864.503.

2. Síminn hf. Tilboð 2: Heildartilboðsfjárhæð 379.000.000.

3. Síminn hf. Tilboð 1: Heildartilboðsfjárhæð 5.000.000.000.

4. Hringiðan ehf. Tilboð 2: Heildartilboðsfjárhæð 1.297.257.098.

5. Hringiðan ehf. Tilboð 1: Heildartilboðsfjárhæð 1.499.719.189.

6. Og fjarskipti ehf. Tilboð 2: Heildartilboðsfjárhæð 1.858.339.001.

7. Og fjarskipti ehf. Tilboð 1: Heildartilboðsfjárhæð 2.256.549.333.

„Umfang verkefnisins í útboðsgögnum byggðist á upplýsingum frá fjarskiptafyrirtækjum um útbreiðslu háhraðaneta og áformum þeirra um uppbyggingu slíkra neta. Í ljós kom eftir að tilboðsfrestur var útrunninn að verulega skorti á að fjarskiptafyrirtækin myndu standa við áformaða uppbyggingu og því ljóst að mun fleiri svæði yrði að taka inn í verkefni fjarskiptasjóðs. Vegna hinna breyttu forsendna var sérstaklega auglýst eftir hvort markaðsaðilar hefðu áform um að byggja upp þjónustu á viðkomandi svæðum.

Engin viðbrögð bárust vegna auglýsingarinnar. Í framhaldi af því var ljóst að stækkun þjónustusvæða var nauðsynleg þar sem ella hefðu um 600 heimili á landsbyggðinni verið án tenginga við háhraðanet og markmið verkefnisins um að öll heimili yrðu tengd háhraðaneti myndi því ekki ná fram að ganga.

Samningaviðræður fóru fram við lægstbjóðanda, Símann hf., og hófust skýringarviðræður í árslok árið 2008. Auk þess sem verkefnið hafði aukist að umfangi var ljóst að vegna efnahagshrunsins voru ýmsar forsendur breyttar og ljóst að gengisfall krónunnar hafði veruleg áhrif til hækkunar á kostnaði við verkefnið og endanlega samningsfjárhæð.

Skýringaviðræðum lauk með samningi sem skrifað var undir 25. febrúar 2009," segir í tilkynningunni.