Löwen tapaði eftir framlengingu

Hamburg varð í dag þýskur bikarmeistari í handknattleik eftir dramatískan sigur á Íslendingaliðinu Rhein Neckar Löwen. Hamburg vann með einu marki, 34-33, eftir framlengingu.

Leikurinn var í járnum allan tímann. 15-15 í hálfleik og 30-30 að loknum venjulegum leiktíma.

Löwen byrjaði framlenginguna skelfilega og skoraði ekki í fyrri hálfleik framlengingar. Hamburg skoraði aftur á móti þrjú mörk og var með pálmann í höndunum er aðeins fimm mínútur voru eftir.

Löwen gafst ekki upp og jafnaði, 33-33, þegar rúm mínúta var eftir.

Hamburg skoraði að bragði og Löwen fékk lokasóknina. Þá tapaði Ólafur Stefánsson boltanum þegar það átti líklega að dæma aukakast. Svekkjandi fyrir Íslendingaliðið.

Ólafur átti stórleik í liði Löwen, skoraði átta mörk, þar af fimm úr vítum og átti þess utan aragrúa stoðsendinga. Snorri Steinn Guðjónsson var einnig góður í liði Löwen og skoraði tvö mörk.

TuS N-Lübbecke náði þriðja sæti í bikarnum með 29-26 sigri á Gummersbach.

Þórir Ólafsson komst ekki á blað hjá TuS N-Lübbecke í leiknum og Heiðmar Felixson lék ekki með liðinu.

Róbert Gunnarsson skoraði tvö mörk fyrir Gummersbach.