Forsætisráðherra sendi framkvæmdastjóra AGS bréf

Jóhanna Sigurðardóttir forsætisráðherra sendi Dominique Strauss Kahn, framkvæmdastjóra Alþjóðagjaldeyrissjóðsins, bréf í dag. Í bréfinu sagði hún að íslensk stjórnvöld leggi áherslu á að efnahagsáætlun ríkisstjórnarinnar og Alþjóðagjaldeyrissjóðsins haldi hindrunarlaust áfram, þótt fyrirsjáanlegt sé að lausn Icesave málsins muni tefjast vegna fyrirhugaðrar þjóðaratkvæðagreiðslu.

Í bréfi forsætisráðherra kemur fram að endurskoðun efnahagsáætlunarinnar sé einn af mikilvægustu þáttum í endurreisn íslensks efnahagslífs. Því sé afar þýðingarmikið að endurskoðunin eigi sér stað svo fljótt sem kostur sé, ekki síst til þess að tryggja fjárfestingar og uppbyggingu atvinnulífs í þeirri endurreisn sem hafin er á Íslandi.