Pétur vissi ekki að hann væri í viðtali

Pétur Blöndal þingmaður segir í samtali við fréttastofuna að hann hafi ekki vitað að hann væri í viðtali við Fréttablaðið, en hann segir í blaðinu í morgun að þingmannsstarfið sé mannskemmandi og illa borgað. Svo sé honum stillt upp „eins og glæpamanni" vegna styrkjamála, en hann hefur ekki gefið upp nöfn hjóna sem prentuðu fyrir hann kosningabækling.

Pétur Blöndal var inntur eftir því af blaðamanni Fréttablaðsins hver hefði styrkt hann í prófkjöri haustið 2006 vegna þingkosninganna 2007, en Pétur gaf ekki upp styrkina til Ríkisendurskoðunar en honum bar engin lagaleg skylda að upplýsa um þá. Einhver styrkti Pétur fyrir nær fjórðung af prófkjörskostnaði hans, um 700.000 krónur, en heildarkostnaður prófkjörsins mun hafa verið um þrjár milljónir króna.

Pétur segir í samtali við Fréttablaðið að 700 þúsund krónurnar hafi komið frá hjónum sem hafi prentað fyrir hann framboðsbækling. Hann hafði í síðustu viku sagst ætla að fá leyfi til að nafngreina manninn, en segist ekki vera búinn að tala við hann.

Síðan segir Pétur í samtali við Fréttablaðið: „Í hvert einasta skipti sem ég býð mig fram hugsa ég hvort ég eigi að halda þessari vitleysu áfram því þetta er mannskemmandi að vera í þessu. Sérstaklega af því að maður er stimplaður glæpamaður fyrirfram. Mér er skapi næst að hætta bara. Þá skulu menn reyna að fá almennilegt fólk inn á þing þar sem ekki er borgað fyrir menntun eða reynslu. Ég fæ ekkert borgað fyrir menntunina mína, átta ára háskólanám, og er búinn að borga átta milljónir fyrir að fá þessa vinnu. Þetta er galið," segir hann.

Fréttastofa náði tali af Pétri nú í morgun, en hann var á fundi efnahags- og skattanefndar og gat ekki veitt viðtal. Hann sagði í samtali við fréttastofu að hann hefði ekki talið sig vera í viðtali þegar Fréttablaðið hefði haft samband við hann, heldur hafi hann verið að veita blaðamanni "background upplýsingar." Pétur sagði samt að sér liði oft þannig að þingmannsstarfið væri ekki metið að verðleikum og að rétt væri haft eftir sér í blaðinu. Hann sagðist vera á þingi af fullum heilindum, hann hefði sóst eftir þessu starfi vegna hugsjóna sinna og hann hefði fjármagnað sína baráttu í prófkjörum að stærstum hluta sjálfur.