Segir nauðsynlegt að yfirbuga Talibana svo 9/11 endurtaki sig ekki

Barack Obama segir nauðsynlegt að yfirbuga Talibana í Afganistan til að koma í veg fyrir álíka hryðjuverk og áttu sér stað þann 11. september 2001.

Forsetinn talaði til fyrrum hermanna í Phoenix en síðar í vikunni fara fram forsetakosningar í Afganistan.Hann sagði að bandarískar hersveitir ynnu nú hörðum höndum við að tryggja að kjörstaðir í Afganistan yrðu öruggir. Þá sagði hann einnig að þó að baráttan gegn uppreisnarmönnum væri hörð og blóðug, þá væri hún þess virði.

Þessi ummæli Obama koma í kjölfar ákvörðunar breskra yfirvalda að halda hersveitum sínum í Afganistan í það minnsta næstu fimm ár. Ummælin koma einnig í kjölfar aukinna blóðsúthellinga í þessari baráttu undanfarinn mánuð, þar sem margir aðilar vinveittir Bandaríkjunum hafa fallið.

Obama ítrekaði þá skoðun sína að besta blandan gegn Talibönum innihaldi hervald, ráðsnilld og þróun.