Safnað fyrir vatnsverkefni

Í dag halda fermingarbörn á öllu landinu áfram að ganga í hús og safna fyrir vatnsverkefni Hjálparstarfs kirkjunnar. Þau hafa hjá prestinum sínum séð myndir og fræðst um munaðarlausa fjölskyldu í Úganda sem lifir við erfiðar aðstæður. Foreldrarnir eru látnir úr alnæmi og börnin þurfa að nota tvær klukkustundir á dag til að sækja vatn.

En ekki bara það heldur er vatnið ókræsilegt, sótt í leirtjörn þar sem dýr og menn ganga jafnt að. Þau fá líka að heyra hvernig vatnsverkefni Hjálparstarfsins í Afríku breyta erfiðum aðstæðum til hins betra. Í Úganda eru reist hús og vatnstankar sem safna rigningarvatni, í Malaví eru grafnir og boraðir brunnar sem gefa hreint, tært og heilnæmt vatn. Hreint vatn í næsta nágrenni gjörbreytir lífinu til hins betra. Stúlkur þurfa ekki að missa af skólanum vegna tímans sem fer í að sækja vatn, heilsan verður betri og mæður og feður hafa tíma til að sinna fjölskyldunni, börnum og akri betur.

Fermingarbörn láta ekki duga að fræðast um kristna trú heldur láta athafnir fylgja orðum og ganga tvö og tvö í hús með merkta og innsiglaða bauka og biðja um framlag til vatnsverkefna Hjálparstarfsins í Afríku. Þau eru fyrirmynd fyrir okkur hin um að gera eitthvað í málunum, standa upp úr sófanum og grípa til aðgerða. Allt í sjálfboðavinnu. Er það ekki einmitt slíkt hugarfar sem við þurfum á að halda á Íslandi í dag? Er það ekki einmitt slíkur kraftur sem við þurfum á að halda? Er það ekki einmitt slík samstaða sem er nauðsynleg í dag? Er það ekki slíkur kærleikur sem við þráum öll? Tökum þátt í kærleiksverki fermingarbarna, stöndum upp úr sófanum og setjum pening í baukinn til góðs fyrir þá sem hafa ekki einu sinni aðgang að hreinu vatni.

Höfundur er fræðslu- og upplýsingafulltrúi Hjálparstarfs kirkjunnar.