Tiger Woods gulltryggði Bandaríkjamönnum sigurinn í Forsetabikarnum

Það kom fáum á óvart að Bandaríkjamenn fóru með sigur af hólmi gegn Alþjóðaliðinu í keppninni um Forsetabikarinn en Bandaríkjamenn voru fyrir keppnina taldir mun sigurstranglegri.

Það var vel við hæfi að Tiger Woods hafi tryggt Bandaríkjamönnunum sigurinn þegar hann hafði betur gegn Yang yong-eun en Woods vann allar fimm viðureignir sínar í mótinu.

Bandaríkjamenn unnu samanlagt 19,5 stig á móti 14,5 stigum Alþjóðaliðsins og hafa nú unnið sex af átta skiptum sem mótið hefur verið haldið og þar af allar keppnirnar á heimavelli sínum í Bandaríkjunum en keppt var á Harding Park golfvellinum í San Francisco í Kaliforníu.

„Við spiluðum mjög vel sem lið og ég er mjög stoltur að hafa verið hluti af því. Við vorum allir að spila mjög vel um helgina og pútta vel," sagði Woods eftir að sigurinn var í höfn.