Upptekin við önnur störf

Sigrún Elsa Smáradóttir, borgarfulltrúi, skrifar grein í Fréttablaðið 13. ágúst sl. og gerir tilraun til að svara þeim athugasemdum sem ég hef gert við fyrri skrif hennar um málefni borgarinnar og Orkuveitu Reykjavíkur.



Sala á hlut borgarinnar í LandsvirkjunSigrún Elsa er þeirrar skoðunar að sala á hlut Reykjavíkurborgar í Landsvirkjun hafi verið borginni óhagstæð. Ég fullyrði að fáir eru á hennar bandi og salan hefur nú gert borginni betur kleift að komast frá þeim þrengingum sem önnur sveitarfélög eru að ganga í gegnum í kjölfar bankahrunsins og falls krónunnar. Salan var gerð á hárréttum tíma og víst er að ríkið yrði ekki í stakk búið að kaupa hlutinn á næstu árum.



Ábyrgðargjald LandsvirkjunarKjarni málsins er sá að ábyrgðargjaldið er greitt með réttum hætti til borgarinnar. Sigrún Elsa gaf annað í skyn en Friðrik Sophusson, forstjóri Landsvirkjunar, hefur leiðrétt rangfærslur hennar um málið. Sigrún Elsa lofar að Samfylkingin berjist fyrir því að ábyrgðargjald það sem Landsvirkjun greiðir borginni verði hækkað. Í þessu vil ég styðja hana. Barátta Sigrúnar Elsu og Samfylkingarinnar ætti að vera auðveld þar sem stjórnarformaður Landsvirkjunar kemur úr röðum Samfylkingarinnar, iðnaðarráðherra kemur úr röðum Samfylkingarinnar og forsætisráðherra kemur úr röðum Samfylkingarinnar. Reykjavíkurborg getur alveg þegið hærra ábyrgðargjald.



Verkefni OR/REI á Filippseyjum

Sigrún Elsa reynir að tengja mig við milljarða fjárfestingu á Filippseyjum, sem 100 daga meirihlutinn undir forystu Samfylkingarinnar ráðgerði. Í minni borgarstjóratíð voru engin fyrirheit eða samningar gerðir um kaup á hlutabréfum fyrir 12,5 milljarða króna í orkufyrirtæki þar sem stóð í einkavæðingarferli. Segist hún hvergi hafa komið nærri og verið upptekin við önnur störf meðan um þetta var vélað. Gott og vel. Þetta er nokkuð sérkennilegt miðað við þær kröfur sem þær stöllur Sigrún Elsa og Svandís Svavarsdóttir vildu hafa í öllum málum: Opin, gegnsæ og lýðræðisleg vinnubrögð. Er það í raun svo að Sigrún Elsa og Svandís hafi ekki vitað að til stæði að OR/REI keypti hlutabréf fyrir 12,5 milljarða króna í orkufyrirtæki á Filippseyjum sem stóð í einkavæðingarferli þrátt fyrir að þær stöllur hafi á þessum tíma verið að gera eitthvað annað? Ég skoraði á Sigrúnu Elsu að tjá sig um vinnulag 100 daga meirihlutans þegar fjallað var um tugmilljarða fjárfestingu REI/OR á Filippseyjum í stjórn Orkuveitunnar en það vill hún sýnilega ekki. Hún veit að vinnubrögðin standast ekki skoðun. Blessuð Sigrún Elsa.

Höfundur er forseti borgarstjórnar.