Rangfærslur leiðréttar

Fréttablaðið birti í gær frétt þess efnis að ástæður þess að Fjármálaeftirlitið hafi í sumar ákveðið að endurupptaka athugun sem lauk í maí sl. á viðskiptum mínum með hlutabréf í Landsbanka Íslands í september 2008 séu annars vegar þær að Fjármálaeftirlitið hafi komist að því að upplýsingar um yfirvofandi fall íslensku bankanna hafi í mars 2008 verið kynntar á fundi í samráðshópi ráðuneyta og stofnana sem ég átti sæti í og hins vegar fundur sem ég sat ásamt fleiri fulltrúum Íslands með fjármálaráðherra Breta haustið 2008.

Má skilja frétt blaðsins á þann veg að það hafi ekki verið fyrr en í sumar, eftir að athugun Fjármálaeftirlitsins á umræddum hlutabréfaviðskiptum lauk, sem Fjármálaeftirlitið komst á snoðir um tilvist umrædds samráðshóps og um umræddan fund með fjármálaráðherra Breta! Af þessu tilefni skal eftirfarandi tekið fram :

1. Tilvist umrædds samráðshóps var ekki meira leyndarmál en það að um hann hafði verið gert samkomulag milli þriggja ráðuneyta, Seðlabanka og Fjármálaeftirlits sem greint var frá opinberlega á sínum tíma og var raunar að finna á heimasíðu forsætisráðuneytisins. Fjármálaeftirlitið átti sem sé aðild að samráðshópnum og þekkti því frá fyrstu hendi það sem þar fór fram. Samráðshópnum var ekki ætlað neitt eftirlits- eða stjórnsýsluhlutverk og þar voru ekki kynnt nein gögn um rekstur eða útlán einstakra banka.

2. Það er alrangt að samráðshópnum hafi í mars 2008 verið kynnt skýrsla erlends fjármálastöðugleikasérfræðings um yfirvofandi fall bankanna. Sú skýrsla sem væntanlega er átt við var unnin í framhaldi af norrænni viðlagaæfingu á sviði fjármálastöðugleika haustið 2007 sem Ísland tók þátt í, en slíkar æfingar fóru reglubundið fram víða um lönd og má líkja við nokkurs konar flugslysaæfingar. Umrædd skýrsla var af þessum meiði, þ.e. upplistun sviðsmynda um hugsanlega birtingarmynd og áhrif mögulegra erfiðleika hjá íslensku bönkunum. Skýrslan var kunn samráðshópnum og þar með Fjármálaeftirlitinu. Við athugun Fjármálaeftirlitsins var beinlínis horft til þeirra upplýsinga sem ég hefði haft vegna setu í umræddum samráðshópi.

3. Um fáa fundi sem ég hef setið hefur meira verið fjallað opinberlega en fund þáverandi viðskiptaráðherra og nokkurra íslenskra embættismanna með fjármálaráðherra Breta í byrjun september 2008. Er því varla hægt að ætla Fjármálaeftirlitinu það að því hafi ekki verið kunnugt um umræddan fund fyrr en sumarið 2009, ekki síst þar sem fulltrúi þeirra sat fundinn! Margoft hefur komið fram að á þessum fundi var ekkert rætt um fjárhagsstöðu Landsbankans.

Höfundur er ráðuneytisstjóri.