Punktar um leiki helgarinnar á Englandi

Leikur helgarinnar í enska boltanum verður án efa grannaslagur Tottenham og Arsenal á sunnudaginn þar sem þessir erkifjendur mætast í 144. sinn.

Rússneski leikmaðurinn Andrei Arshavin sem á dögunum gekk í raðir Arsenal verður væntanlega í hóp liðsins þegar það sækir Tottenham heim klukkan 13:30 á sunnudaginn.

Robbie Keane leikur væntanlega sinn fyrsta leik fyrir Tottenham eftir að hafa komið aftur til félagsins frá Liverpool á dögunum. Keane hefur strax verið gerður að fyrirliða liðsins.

Grannarnir í norðurhluta Lundúna eru á ólíkum stað í deildinni en bæði lið þurfa lífsnauðsynlega á stigum að halda - Arsenal í baráttunni um meistaradeildarsæti og Tottenham í fallbaráttunni.

Emmanuel Eboue er klár í slaginn hjá Arsenal en þeir Abou Diabi, Cesc Fabregas, Theo Walcott og Tomas Rosicky eru sem fyrr meiddir.

Liverpool verður án fyrirliða síns Steven Gerrard þegar það sækir Portsmouth heim í kvöldleiknum á laugardaginn. Liverpool þarf mjög nauðsynlega á sigri að halda eftir slakt gengi frá áramótum og því ætti heimsókn til Portsmouth að vera fínn vettvangur til að ná liðinu á strik á ný.

Tony Adams gæti gefið grísku nýliðunum Angelos Basinas og Theofanis Gekas tækifæri, en Jermaine Pennant má ekki spila gegn uppeldisfélagi sínu. Portsmouth hefur gengið afleitlega í tíð Tony Adams og veitir ekki af stigunum.

Manchester United gæti endurheimt þá Wayne Rooney fyrir leikinn gegn West Ham á Upton Park á morgun klukkan 16:00 en Gary Neville er veikur og missir af leiknum.

Petr Cech er meiddur í baki og verður ekki með Chelsea þegar liðið mætir Hull City klukkan 15 á laugardaginn. Ricardo Quaresma gæti þarna spilað sinn fyrsta leik með Chelsea eftir að hafa komið sem lánsmaður frá Inter. Varnarmaðurinn Bernard Mendy hjá Hull tekur út leikbann.

Newcastle fær góð tíðindi fyrir útileik gegn West Brom í fallbaráttunni. Liðið hefur endurheimt framherjana Alan Smith, Mark Viduka og Obafemi Martins.

Þá eru nýju leikmennirnir Ryan Taylor, Kevin Nolan og Peter Lovenkrands allir heilir en miðjumaðurinn Jonas Gutierrez er í leikbanni.

Framherjinn Jay Simpson og miðjumaðurinn Robert Koren eru tæpir hjá West Brom og varnarmaðurinn Gianni Zuiverloon er í leikbanni.

Shay Given gæti vel spilað sinn fyrsta leik fyrir Manchester City þegar liðið tekur á móti Middlesbrough sem er í bullandi vandræðum í deildinni. Boro endurheimtir þó miðjumennina Didier Digard og Gary O´Neil úr leikbanni.

Nýliðarnir Tal Ben-Haim og Calum Davenport gætu komið við sögu hjá Sunderland þegar liðið tekur á móti Stoke á morgun klukkan 15, en Anton Ferdinand er ekki leikfær.

Brasilíumaðurinn Jo fær væntanlega sitt fyrsta tækifæri með Everton á morgun klukkan 15 þegar liðið tekur á móti Bolton. Jo gekk í raðir Everton frá Man City í janúarglugganum.

Miðjumennirnir Olivier Dacourt og Giles Barnes gætu spilað sinn fyrsta leik fyrir Fulham klukkan 15 á morgun þegar liðið sækir Wigan heim. Charles N´Zogbia gæti spilað sinn fyrsta leik með Wigan eftir að hafa komið frá Newcastle.