Öryggi og hegðun barna á netinu

Hvað getum við gert til að efla öryggi í tækni- og netnotkun barna og unglinga? Við þurfum að byrja á því að sá fræinu. Það gerum við með því að virkja þá sem eru í kringum okkur, til dæmis foreldra, skólastjórnendur og alla sem geta komið að þessu verkefni, með jákvæðu hugarfari til að kenna okkur sem yngri erum að fara að með gát. Flas er ekki til fagnaðar og alls ekki þegar netið er annars vegar. Netið er uppfullt af fræðandi möguleikum og skemmtun. Netnotendur ættu hins vegar að gera sér ljóst að ekki eru allar upplýsingar á netinu réttar og þar leynast líka hættur á hverju strái. Ef við, börn og unglingar, eigum að varast þær þurfum við stuðning og fræðslu. Hana viljum við fá frá foreldrum okkar og við viljum líka fá að fræðast um þessi mál í skólanum en í raun ætti að setja örugga netnotkun barna inn í námskrá skólanna sem skyldufag og byrja sem fyrst.

Það sem við gerum á netinu endurspeglar okkur sjálfTökum dæmi. Þú ert með Facebook-síðu, sem er læst öllum öðrum en „vinum" þínum, og þú setur inn ljóta mynd af einhverjum bekkjarfélaga. Þú ert fullviss um að viðkomandi eigi aldrei eftir að sjá myndina en svo kemur annað í ljós. Þessi bekkjarfélagi er í heimsókn hjá einhverjum af „vinum" þínum (sem þú ert með inni á Facebook) og þessi „vinur" skoðar svæðið þitt. Flettir í gegnum myndaalbúmin og klikk - kemur ljóta myndin ekki á skjáinn! „Vinurinn" fer að hlæja og bekkjarfélaginn verður miður sín. Hvernig heldur þú að viðkomandi líði? Gleymum því ekki að það er hægt að rekja tölvupóst og allar færslur sem settar eru inn á netsíður.

Lærum að nota netið rétt

Verum viss. Hugsum áður en við framkvæmum. Það er góð regla að skrifa ekki neitt inn á netið í reiði eða fljótfærni. Munum að það er ekkert einkalíf inni á netinu þannig að þú þarft að passa þig hvað þú setur inn á það. Gullin regla er að hleypa engum inn á svæðið þitt sem þú þekkir ekki. Ég vil nota þetta tækifæri til að benda á heimasíðu Saft.is en hún er uppfull af fræðslu um örugga net- og tækninotkun barna. Þar er að finna netorðin fimm, netheilræði og fleira. Ég hvet alla foreldra til að kynna sér þetta efni með börnum sínum. Slóðirnar eru:

- http://www.saft.is/oruggnetnotkun/netordinfimm/ og

- http://www.saft.is/oruggnetnotkun/fyrirforeldra/netheilraedi

Ég vísa að lokum í áskorun ungmennaráðs Saft þar sem skorað er á skólastjórnendur að halda sérstaka þemaviku nú í haust um jákvæða og örugga netnotkun barna og unglinga.

Höfundur er nemandi í 8. bekk Austurbæjarskóla og meðlimur í Ungmennaráði Saft.