Bikiníbomba stal sundbol

Bikiníbomban Anna Nicole Grayson var ákærð fyrir fíkniefnamisferli, þjófnað og skemmdarvek í tuttugu og fjórum ákæruliðum á dögunum. Nú hafa þrír ákæruliðir bæst við. Meðal annars er Anna ákærð fyrir að hafa stolið vörum úr Bónus og sundbol úr versluninni Sportveri við Glerártorg á Akureyri. Hún er einnig ákærð fyrir fjársvik með því að hafa stolið þremur greiðslukortum úr fataskáp við Djassballetskóla Báru. Í framhaldi af því sveik ún út veitingar á veitingastaðnum Ruby Tuesday með umræddum greiðslukortum.

Vísir hefur áður sagt frá ákæruliðunum tuttugu og fjórum en aðalmeðferð í málinu verður á næstunni.

Anna Nicole vakti mikla athygli er hún tók þátt í bombukeppni Hawain Tropic hér á landi fyrir um tveimur árum. Þá braut hún fánalög með því að koma fram í bikíni sem var í fánalitunum.

Anna Nicole komst þó fyrst í fréttirnar árið 1993 þegar faðir hennar í félagi við annan reyndi að nema hana og systur hennar á brott eftir harðvítuga forræðisdeilu við móður hennar. Málið vakti mikla athygli fjölmiðla á sínum tíma.

Krafist er refsingar yfir Önnu vegna brotanna en hún er einnig ákærð fyrir að hafa lítilræði af amfetamíni undir höndum. Alls krefjast 10 verslanir skaðabóta vegna brota Önnu.