700 heimili leituðu til hjálparsamtaka eftir sumarlokun

Um sjö hundruð heimili sem eiga ekki fyrir mat leituðu á náðir Mæðrastyrksnefndar og Fjölskylduhjálpar í dag. Sumarlokun hefur verið á báðum stöðum síðan í júní og segir kona sem leitaði sér aðstoðar að ástandið hafi verið skelfilegt hjá sér á meðan.

Matarúthlutun hófst aftur hjá Mæðrastyrksnefnd og Fjölskylduhjálp eftir sumarlokun sem hefur verið á báðum stöðum síðan í júní. Ein þeirra sem reglulega hefur fengið mat hjá Fjölskylduhjálp er Gunnhildur Halla Haraldsdóttir. Hún er öryrki og leitaði sér fyrst aðstoðar fyrir tveimur árum en hefur oftar þurft aðstoð en áður síðastliðið ár.

Hún treystir að miklu leyti á matargjafirnar og segir því ástandið hjá sér hafa verið erfitt síðasta mánuðinn á meðan lokað hefur verið. Hún hafi þó reynt að spara enn meira en áður til að geta átt efni á mat og meðal annars hætt með innbústrygginguna.

Fullt var út úr dyrum á meðan úthlutað var hjá Fjölskylduhjálpinni í dag.