Varðandi sjávarútveg

Eini veiki hlekkurinn í okkar ágætu ríkisstjórn er sjávarútvegsráðherra. Athugið að arðvænlegasta nýtingaraðferð fiskimiðanna er fyrst og fremst að umgangast fiskimiðin á landgrunninu með varúð og virðingu. Því eru náttúruvænar veiðar það sem leggja þarf áherslu á.

Okkar háttvirti sjávarútvegsráðherra kaus þann kostinn að byrja starfsferilinn sinn með því að þiggja boð Friðriks Arngrímssonar hjá LÍÚ að fara í skemmtiferð til Bretlands til að kynna sér aðferðir Breta við að vinna hágæða matvæli úr íslensku hráefni. Þessi skemmtiferð er nú orðin þjóðfélagi voru dýrkeypt.

Á sama tíma bauðst ráðherra tækifæri til að íhuga og framkvæma vel rökstudda áætlun sem hefur í för með sér atvinnu fyrir 30 til 40 þúsund einstaklinga. Þetta er nú einu sinni staðreynd sem undirritaður er tilbúinn að rökstyðja. Athugið: til þess að þetta geti orðið að veruleika þarf að stokka upp kvótakerfið. Þessi ágæti ráðherra tók svo steininn úr með því að hleypa að strandveiðidæminu mönnum sem voru búnir að selja og leigja frá sér aflaheimildir sínar. Þetta dæmi er óafsakanlegt tilræði gegn nýliðun í sjávarútvegi, og til stórskammar fyrir Vinstri græna. Fyrst áttu þessir ágætu sölumenn á sameign þjóðarinnar að endurgreiða í ríkissjóð það fé sem þeir höfðu sölsað undir sig á forsendu ólöglegrar fiskveiðistefnu, samkvæmt áliti mannréttindanefndar Sameinuðu þjóðanna, sem við erum aðilar að.

Höfundur er talsmaður Framtíðar Íslands.