Evrubréf ríkissjóðs hafa hækkað um helming í verði

Stærsti skuldabréfaflokkur ríkissjóðs sem útgefinn er í evrum hefur hækkað í verði á erlendum mörkuðum um helming (50%) frá byrjun marsmánaðar. Fyrir sjö mánuðum síðan fengust rúmlega 60 cent fyrir hverja evru nafnverðs þessara bréfa en í gær voru verðtilboð í þau nálægt 90 centum á evru nafnverðs.

Fjallað er um málið í Morgunkorni greiningar Íslandsbanka. Þar segir að þessi verðbreyting jafngildir því að ávöxtunarkrafa bréfanna á eftirmarkaði hafi lækkað úr ríflega 22% niður í 7,7%. Hér er um að ræða 1 milljarðs evra útgáfu með gjalddaga í desember 2011 sem gefin var út í lok ársins 2006 í því skyni að styrkja gjaldeyrisforða Seðlabankans.

Til samanburðar má nefna að vextir í tveggja ára skiptasamningum í evrum, sem oft eru notaðir til að meta grunnvexti, eru nú u.þ.b. 1,65%.

Þessi þróun evrubréfa ríkissjóðs er til marks um að nokkuð hafi miðað áleiðis með að endurverkja trú á íslensku efnahagslífi frá áramótum, þótt minnkandi áhættufælni á heimsvísu spili vitanlega einnig stórt hlutverk í henni.

Þróun skuldatryggingarálags ríkissjóðs segir svipaða sögu, en 5 ára skuldatryggingarálag á ríkissjóð hefur lækkað úr 1050 punktum í upphafi mars niður í 365 punkta í gær. Þótt skuldatryggingarálag á heimsvísu hafi almennt farið lækkandi það sem af er ári er lækkunin óvíða jafn mikil hlutfallslega og í tilfelli Íslands.

Þessi lönd eiga öll sammerkt að auk þess að fá á sig harðan efnahagslegan skell hafa gjaldmiðlar þeirra og fjármálakerfi átt undir högg að sækja, þótt í tilfelli Eystrasaltsríkjanna hafi fastgengi mynta þeirra gagnvart evru raunar staðið af sér storminn enn sem komið er. Lettland hefur auk heldur þegið aðstoð AGS líkt og Ísland og glíma þeirra við að ná jafnvægi í opinberum fjármálum dregur úr möguleikum á að lina högg kreppunnar næsta kastið líkt og hér á landi.