Fjölda leikja frestað á Englandi vegna veðurs

Vetrartíðin á Englandi hefur verið sú harðasta á Englandi í áratugi og í dag er búið að fresta fjölda leikja í neðri deildunum þar í landi.

Leikjum Barnsley-Crystal Palace, Charlton-Cardiff og Watford-Southampton hefur verið frestað í B-deildinni og fjölda leikja í C-deildinni -þar á meðal útileik Guðjóns Þórðarsonar og félaga í Crewe gegn MK Dons.

Tæplega 30 sentimetra snjólag var á vellinum hjá MK Dons við skoðun í gær, en þrátt fyrir að það hefði verið hreinsað af, þótti ráðlegt að fresta leiknum af öryggisástæðum.

Sömu sögu er að segja um ensku D-deildina og utandeildina og þá hefur tveimur leikjum verið frestað í fimmtu umferð skoska bikarsins - leikjum Aberdeen og East Fife og Airdie-Dunfermilne.