Segir Ísland ráða við erlendar skuldir sínar

Ef ekki væri fyrir gjaldeyrishöftin þyrftu stýrivextir líklega að vera 40-50%, segir Mark Flanagan, verkefnisstjóri hjá AGS. Hann telur að Ísland ráði við erlendar skuldir sínar, sem jafngilda þrefaldri landsframleiðslu.

Þetta kom fram á símafundi fjölmiðla með Alþjóðagjaldeyrissjóðnum í dag. Fulltrúar sjóðsins telja að með endurskoðuninni sem fór fram í gær minnki líkurnar á að lánshæfismat Íslands lækki. Áætlun AGS og Íslands gengur meðal annars út á að styrkja gjaldeyrisforðann með lántökum til að auka tiltrú á efnahagslífinu og styðja við gengi krónunnar. Nú hefur hins vegar komið í ljós að forðann á einnig að nota til að greiða niður önnur erlend lán. Flanagan segir stjórnvöld ráða því hvernig forðinn er nýttur, og að við vissar aðstæður sé ráðlagt að beita forðanum í að styrkja krónuna.

Eins og fréttastofa greindi frá í júlí eru erlendar skuldir Ísland mun hærri en talið var þegar samkomulagið við sjóðinn var gert í fyrra, en þær eru nú rúm þreföld landsframleiðsla. Flanagan telur að afgangur af utanríkisviðskiptum muni duga til.

Háir stýrivextir Seðlabankans hafa verið harðlega gangrýndir úr ýmsum áttum en lækkun stýrivaxta er ein meginforsendan í svokölluðum stöðugleikasáttmála sem undirritaður var í sumar. Mark Flanagan segir hins vegar að gjaldeyrishöftin hafi gert Seðlabankanum kleift að hafa stýrivexti einungis 12-18%. Án gjaldeyrishaftanna þyrftu vextirnir að vera 40-50% - það er að segja til að koma í veg fyrir enn frekara hrun á krónunni.

Næsta endurskoðun á efnahagsáætlun Íslands fer fram í desember en þá verður meðal annars lögð áhersla á skuldavanda heimila og fyrirtækja.