OECD: Kreppan dýpri og langvarandi hérlendis

Greining Íslandsbanka fjallar um nýja skýrslu OECD í Morgunkorni sínu. Efnahags- og framfarastofnunin (OECD) spáir því að samdráttur landsframleiðslu verði í ár 7,0% hér á landi og 2,1% til viðbótar á næsta ári en stofnunin birti hagspá sína fyrir aðildarríki sín í morgun.

Reiknar stofnunin með því að íslenska hagkerfið taki ágætlega við sér á árinu 2011 og spáir þá 2,5% hagsvexti á grundvelli þess að fjármálaleg skilyrði leita í eðlilegra horf og fjárfestinga í orkufrekum iðnaði.

Mörg önnur aðildarríki OECD eru þegar farin að sýna bata og spáir stofnunin því að hagvöxtur verði þar 1,9% á næsta ári á meðan íslenska hagkerfið er enn að dragast saman. Spáir stofnunin síðan 2,6% hagvexti á árinu 2011 í aðildarríkjum sínum að meðaltali sem er viðlíka hagvöxtur og stofnunin spáir að verði hér á því ári.

Það er svo sem ekkert nýtt að hagsveiflurnar í íslensku efnahagslífi séu meiri en í meðaltali OECD ríkjanna. Verandi lítið sérhæft hagkerfi mun þetta sennilega alltaf verða raunin. Hitt er hins vegar einnig staðreynd að litið til lengri tíma hefur íslenska hagkerfið vaxið hraðar en OECD ríkin að meðaltali.

Þannig er meðalhagvöxtur tímabilsins 2004 til 2011 samkvæmt spá OECD hér á landi 2,5% en 1,7% í OECD ríkjunum að meðaltali og það þrátt fyrir að Ísland hafi orðið talsvert verr úti í þeirri fjármálakreppu sem heimurinn hefur allur þurft að takast á við undanfarin misseri.

Það hefur hjálpað íslenska hagkerfinu hvað útflutningsatvinnuvegirnir hafa verið lítt snertir af fjármálakreppunni. Á meðan heimsviðskipti hafa í ár dregist saman um 12,5% í magni samkvæmt spá OECD hefur útflutningur vöru- og þjónustu héðan aukist um 0,8%. Afli íslenskra skipa fer ekki eftir því hvort heimsbúskapurinn sé í samdrætti eða ekki og framleiðsla stóriðju er nokkuð föst til skemmri tíma a.m.k.

Þessu væri á annan hátt farið ef Ísland væri t.d. sérhæft í framleiðslu vöru á borð við bifreiðar eða raftæki líkt og Þýskaland og Japan. Í samdrættinum undanfarið á heimsvísu eru það kaup á þessum hlutum sem neytendur hafa sparað við sig.

Íslenskra hagkerfið hefur þannig flutt út hluta af samdrætti sínum í neyslu og fjárfestingu til annarra hagkerfa. Lágt raungengi hefur síðan hjálpað ferðaþjónustunni hér á landi á tímabili þegar greinin hefur þurft að glíma við samdrátt á heimsvísu.